Silent Water

message IN, message OUT

      May mga pagkakataong ang sarap ibasura nitong aking roaming SIM at cell phone.  Madalang lang naman kasing tumunog.  Kapag tumunog, may mensahe galing Pilipinas.

     Dito sa Australia, ang pangalawa sa mga pangkaraniwang tanong ng mga kaibigan kong ‘puti’ sa akin ay kung bakit kailangan ko pang magdala ng dalawang cell phones.  Siyempre paliwanag naman ako, in English of course, sinasabi ko sa kanila na ang isa kong mobile phone (ayaw kasi nila ng cell phone, very American daw yun) ay may SIM na galing pa sa Pilipinas.  Di ko pa nasasabi ang tungkol sa pangalawa kong mobile phone—na ang nakasaksak ay Australian SIM, aba, may itinatanong na naman silang kasunod!  Kulit din ng mga ‘to, akala nyo ba.   

     Bakit daw kailangan ko pa ng Philippine SIM?  Ayun, paliwanag na naman akong mas mura para sa aking mga friends and relatives na mag-send ng message sa akin dito sa Australia sa pamamagitan ng roaming SIM ko, huwag lang silang malitong mai-send ang message nila dito sa Aussie SIM ko.  Sinabi ko pa nga sa mga ‘puti’ ang halaga in Au$ at dahil decimals and in cents na ito, medyo hirap pa ‘kong tuusin.  Palibhasa bobo sa Math, kaya nga ako nag Vet .

     Ito ang aking kwento.  Abot-kaya naman ang halaga ng mensaheng papasok dito sa aking roaming pero bakit madalang pa itong nakakatanggap ng mensahe?  May mga panahong tatlong araw zero talaga! Tsk, tsk, tsk!  Hinahayaan ko na nga lang, baka kasi abala rin ang mga contacts ko sa Pinas sa kani-kanilang mga buhay.  Tulad ko, may sarili rin naman kasi silang mga laban sa buhay doon.  Naisip ko rin baka wala silang load, kadalasan kasi nilang daing, ang hirap ng buhay sa Pilipinas!  Parang sinasabing magpapasa-load sila sa ‘kin, kung pwede nga lang sana.

     Di naman ako makatiis minsan, kaya ako ang mauunang mag-text sa kanila gamit ang Aussie SIM ko.  Palagi pang Australian greetings ang simula, “G’day,mate! Ow yer doin’?” para ramdam talaga nilang galing OZ ang mensaheng natanggap nila.  Nilalagyan ko pa ng U at o”,) sa dulo, na ang ibig sabihin ay masaya, nagbibiro at OK lang ako.  Totoo naman talaga, masaya ako,  dahil kapag ako’y malungkot  =(  naman ang banat ko, at  =’(  naman kapag mangiyak-ngiyak na talaga ‘ko.   

     Masaya kapag may nagre-reply, abot tenga ang aking ngiti...  Sobrang saya, heaven!  Kung pwede nga lang lumundag at sumigaw sa loob ng chicken shed ay gagawin ko, pero magugulatin ‘tong mga alaga namin kaya bawal kaming tumalon at mag-ingay.  Kapanapanabik kapag mahaba ang mensahe, lalung-lalo na kapag punong-puno pa ito ng mga salitang may pamukaw-sigla!  Pakiramdam ko napakalapit lang ng mga kaibigan at mga kamag-anak ko sa ‘kin.  Wow, ang liit lang pala ng mundo!  They’re just a text message away!

     Kahit gabi, hating-gabi, at madaling-araw, nakabukas ang roaming ko.  Baka kasi may emergency, mag-text sila—physical concerns, emotional problems, pati psychological worries kasama na rin.  Kahit may mga pangkasalukuyang pasakit rin akong nararanasan dito sa Land Down Under, todo-suporta naman ako sa pamamagitan ng pagpapayo ‘kala mo’y may alam din talaga sa buhay thru text.  Dahil sa pamamagitan nito, dama kong may kabuluhan din ako sa mundo.

     May mga pagkakataong matagal talagang hindi tumutunog itong roaming ko.  Kapag ganito ang katayuan at bigla itong tumunog, parang ayaw ko naman itong buksan at basahin…  Balisa ang mga daga sa loob ng aking dibdib, nanlalamig at nagpapawis ang aking mga palad, at dahan-dahang tumatayo ang aking mga balahibo!  Takot kasi ako, nangangamba.  Malamang problema na naman, malaking problema!  Kamot ako ng ulo, titingala at magkukunwaring walang naririnig na message alert tone, ‘yan ang drama ko…  Minsan nga mas gusto ko pang ako nalang ang mauunang mag-text kaysa ganito ang sitwasyon.  Naiisip ko kasi agad ang worst case scenario.  Alam nyo na…  Malubhang karamdaman, sakuna, kamatayan, o mga malalaking bagay na nauukol sa pananalapi.  

     May mga pagkakataong ang sarap ibasura nitong aking roaming SIM at cell phone.  Madalang lang naman kasing tumunog.  Kapag tumunog, may mensahe galing Pilipinas.